النتائج 1 إلى 3 من 3

الموضوع: تجربي مع اكسبلورر 2012 خلط الماي مع الزيت

  1. #1
    monaya غير متصل متخصص اكسبلورر
    تاريخ التسجيل
    Dec 2011
    المشاركات
    226

    افتراضي تجربي مع اكسبلورر 2012 خلط الماي مع الزيت

    السلام عليكم يا اخوان

    مدري اذا فيه احد يذكرني ولا لا انا لي فترة قرابة السنة ما دخلت المنتدى ولا شاركت

    واللي خلاني ادخل حبيتافيد الاعضاء بالمشكلة اللي صارت لي وان شالله ان الجميع يستفيد منها


    انا سيارتي كانت ماشية 150 الف يعني خارج الظمان وكنت اغير لها الزيت في الوكالة ما عدا ثلاث مرات غيرت لها في محل زيت عادي مو بترومين وكنت اشتري الزين بنفسي من الوكالة واغيره في المحلات العادية بقيمة 30 ريال

    المهم
    مرة من المرات كنت ماشي عادي في الطريق سمعت صوت خرشة في المكينة بعد ما اشيل رجلي من دواسة البنزين
    يعني وانا ادعس بنزين عادي لكن لمن يروح ضغط البنزين اسمع صوت خرشة

    وديت السيارة الى ميكانيكي جنب بيتي في الهفوف
    قالي هذا الصوت صادر من المروحة ودها لكهربائي قلت اوكي ممتاز

    ابد طلت من عنده ادعس بنزين اشوف عزم السيارة مافي عزم

    تمشي لكن مو المشي اللي انا متعود عليه اسمع جعجعة ولا ارى طحينا على قولتهم

    فجاء لاحظت ان الحرارة ارتفعت فوق النص بثلاث شرطات تقريبا يعني ما وصلت التوب لا خلونا نقول ثلاث ارباع الامبير حق الحرار

    يعني لسا باقي الربع
    انا كنت ماشي في شارع بالنص دعست بنزين بس ابي اجنب عشان اطفي السيارة لقيت السيارة طفت لحالها وطلعت لي لمبة مع رسالة مكتوب عليها ظغط الزيت منخفض

    طبعا السيارة طفت لحالها ما شغلتها نهائيا فتحت الكبوت شميت ريحة غريبة
    طلعت صيخ معيانة الزيت لقيت الزيت صاير كبتشينو

    خلط الماي مع الزيت

    طبعا انا بيني وبينكم جتني صدمة نفسية وضاق خلقي سيارة تعتبر جديدة وهذي علامة من علامات تخبط المكينة وانا كنت من الناس المواظب على الصيانة اول باول ودايم اغير زيت في الوكالة وحتى ماي الراديتور اشيك عليه اول باول

    يعني معقولة هذا الشي صار

    المهم تعوذت من ابليس واتصلت على سطحة وخذتها على طول للوكالة

    ليش وديتها الوكالة لان الوكالة تظمن لي المكينة والقير لمدة خمس سنوات او 200 الف كيلو ممشى

    قلت في نفسي اتمنى انهم يصلحونها

    وديتها لهم شافها لي المهندس قالي السيارة طفت لحالها قلت له ايه

    قالي الحرار اتفعت كاملة قلت له لا باقي ربع
    قالي عموما السيارة طفت لحالها هذا شي طيب لان نظام السيفتي اشتغل عندك في سيارتك

    قلت له والمكينة هي هي مخبطة ولا لا

    قالي فيه ثلاث احتمالات

    الاحتمال الاول انها مخبطة بالكامل وبهذي الحالة تحتاج توضيب

    الثانية انها الراس منشعر وفي هذي الحاله تحتاج نص توضيب

    والحالة الثاللثة انها ما خبطت

    طبعا نا قلت له مستحيل ما تخبط كيف والماي خلط الزيت بالميكنة

    قالي ممكن انها ما خبطت وبنجرب كل شي وبنشوف

    اول شي بنفحصها
    قلت له طيب والتكاليف قالي انت اذا مغير جميع صياناتك والزيوت عندنا فالضمان راح يشملك

    قلت له انا جميع الصيانات اسوها عندكم ما عدا ثلاث مرات سويتها برا الوكالة

    قالي روح جيب فواتير

    قلت شلون اجيب فواتير انا ماغير عند بترومين غيرت عند محلات ابو يمن

    مع احترامي للاخوة اليمنيين طبعا

    قالي مو مشكلة روح للمحل اللي غيرت منه وهات الفواتير

    قلت له يا رجل ما اذكر وين بالظبط يمكن مرة بالدمام او مرة بالرياض

    قالي اهم شي جيب فواتير ودبر عمرك

    والله على طول رحت محل جنب بيتنا وجبت فواتير من واحد يمني ولد حالال عطاني اياها غيرت عنده مره وحده بس ودبرني بثنتين

    وديتهم للوكالة قالو لي خلاص انتظر نرفع لك طلب الى امان الشرق ونشوف متى يردون

    رد امان الشرق في غضون ثلالث ايام بالموافقة على الفصح المبدي اولا ومعرفة الاضرار

    بعدين طلعت الاضرار مروة اللديتر خربانه وخربت طربة الماي وطرمبة الزيت

    بعدين رفعو طلب ثاني الى امان الشرق

    ولله الحمد جت الموافقة بالتصليح بعد كذا قالو لي خلاص احنا حاليا مراح نفك الميكنة لان اذا فكينا المكينة وهي مو مخبطة انت الخسران

    قلت طيب وش السواة

    قالو بننزل الزيت المحروق اللي داخلها وبنغسلها من داخل وبنحط لها زيت جديد وبنغيير طرمبة الماي وبنغير طرمبة الزيت والمروحة بعدها بنشوف بنشغل الميكنة اذا اشتغلت تمام بنختبر ظغط المكينية على ثلاث مستويات بالكمبيوتر اذا عدت الاختبار معناها مكينتك مافيها شي

    وفعلا هذا اللي سووه

    وسوو الاختبار قداري والحمدلله طلعت المكينة ممتاز ما جاها شي وعطوني ضمان سنة او 20 الف لو حصل للمكينة اي شي ارجعها لهم على الظمان غير ظمان امان الشرق الاصلي

    واستلمت السيارة قبل ثلاث اسابيع ولي الحين عليها تقريبا ثلاث اسابيع وجربتها على خط الرياض ومشيت فيها كل شي تمام وراقبت الحرارة مارتفعت ولا شي ولله الحمد وماحسيت بفرق عن الاول ابد

    بل بالعكس احس انها اهدا ويمكن هذا الهدوء لاني غيرت كرسي المكينة

    المهم اني ما دفعت لهم ولا ريال غير قيمة الكرسي

    الباقي الظمان هو اللي دفعه في حدود 5000 ريال وعليها

    الشاهد يا اخوان انا عندي استفسار

    في احد الشباب سمعت منه يقول دامهم غيرو الطرمبة معناها فكو المكينة

    هل هذا صحيح

    وان شالله تستفيدون من التجربة

  2. #2
    شواطئ الحب غير متصل عضو ملَكي
    تاريخ التسجيل
    Apr 2014
    المشاركات
    551

    افتراضي رد: تجربي مع اكسبلورر 2012 خلط الماي مع الزيت

    اول شي الحمدلله ع السلامه والحمدلله جات بسيطة
    والاحلى انها كانت تحت ضمان الوكيل
    انصحك غير الزيت عند شركات معتمدة
    وبالنسبة لاستفسارك
    رح تاكد من الصناعية او انتظر احد فاهم في هالمواضيع

  3. #3
    عبد الكريم غير متصل عضو نشيط
    تاريخ التسجيل
    Apr 2012
    المشاركات
    91

    افتراضي

    الحمد لله على سلامتك.
    الذي فهمته، أن مروحة الردييتر خربت - لسبب ما، والملاحظ أن السيارة لا زالت بحكم الجديدة - ثم لخراب المروحة ارتفعت الحرارة وخربت باقي الأشياء.

    هل فهمي صحيح؟

    Sent from my SM-G900F using Tapatalk

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
عن فورد العربية
منتديات فورد العربية هي لمالكي ومحبي سيارات فورد ولا يمثل الموقع شركة فورد المالك الرئيسي لعلامة FORD ولا يمثل أي من موزعيها، وجميع المواضيع او المشاركات المطروحة تمثل وجهة نظر كاتبها فقط
تابعنا على تويتر